Një shqiptar i Kosovës është infektuar me variantin e ri të koronavirusit që qarkulloi fillimisht në Angli. Personi në fjalë qëndron përkohësisht në Slloveni dhe mësohet se ai është infektuar në Belgjikë ku edhe punon.
Mediat sllovene shkruajnë se ai kishte udhëtuar përmes Sllovenisë nga Kosova në Belgjikë, në mes të janarit të këtij viti.
Në testin e parë që kishte bërë për COVID-19 shqiptari kishte rezultuar negativ, por një ngatërressë kishte ndodhur dhe personat që i bënë testin e telefonuan për t’i thënë se ai ishte prekur me variantin e ri të virusit. Nga ana tjetër policia është duke kryer hetime pasi rasti në fjalë është i dyshimtë.
Më 23 janar, ai më pas u kthye në Kosovë përmes Sllovenisë. Ka qenë policia e qytetit të Kranjës që e gjeti atë në momentin kur po priste mjetin e transportit gjatë tranzitit.
Ende nuk është e faktuar nëse shqiptari ka pasur kontakte me persona të tjerë që mund të kenë rezultuar pozitiv me virusin e ri, pasi në Slloveni është regjistruar vetëm një rast I tillë. Policia sllovene i ka kaluar autoriteteve italiane informacione për shoferin me të cilin ai mbërriti në Slloveni. Mësohet se i infektuari është vendosur tashmë në karantinë dhe ende po punohet për të zbardhur rrethana të reja të çështjes.
