Sipas reumatologëve, sëmundjet reumatizmale, nuk sjellin komplikacione nëse një pacient i cili vuan nga këto sëmundje, do të infektohet me Covid-19.
Këtë e ka konfirmuar edhe reumatologia, Blerina Dhamo, e cila sqaroi se nga studimet e fundit ka rezultuar se ky grup pacientësh që vuajnë nga kjo sëmundje nuk kanë risk më të lartë për të qëndruar më gjatë në spital apo të humbin jetën.
Në një intervistë për një emision televiziv, mjekja Dhamo i ka kërkuar pacientëve që të bëjnë kujdes dhe të mos ngatërrojnë simptomat e sëmundjeve reumatizmale me ato të Covid-19 pasi janë të ngjashme.
“Kërkuesit shkencor studiuan gati 6 mijë pacientë për periudhën janar-qershor 2020 dhe u pa që sëmundja reumatizmale nuk i rrezikonte individët për t’u infektuar apo për komplikacione. Këta pacientë kanë të njëjtët faktorë risku siç ka popullata.
E rëndësishme është që të komunikohet me një mjek. Sa i përket ndërprerjes së medikamenteve që marrin pacientët për sëmundjet reumatizmale bëhen vetëm me kompetencën e mjekut reumantolog”, ka thënë reumatologia Dhamo.
Ndër të tjera ajo shtoi se pacientët me me sëmundje reumatizmale e kanë të domosdoshme që të vaksinohen çdo vit me vaksinën e gripit
“Meqenëse jemi në fushatën e vaksinimit të gripit, pacientët me sëmundje reumatizmale e kanë të domosdoshme që të vaksinohen çdo vit me vaksinën e gripit dhe njëherë në pesë vjet me vaksinën e pneumokokut”, ka sqaruar mjekja.
Kujtojmë se sëmundjet reumatizmale shpesh zbulohen vonë, dhe kjo është edhe një prej arsyeve të mosnjohjes së shenjave dhe që ngjajnë me ato të koronavirusit./GazetaReforma.com/
