Ditën e sotme Komisioni Qendror i Zgjedhjeve ka dërguar në Prokurori për verifikim të thelluar në kuadër të ligjit të Dekriminalizimit 38 kandidatë për kryetarë bashkie dhe për anëtarë të këshillave bashkiakë. Kryetari i KQZ, Ilirjan Celibashi deklaroi në një prononcim për mediat se janë 10 kandidatë për kryebashkiakë dhe 28 kandidatë për anëtarë të këshillave bashkiakë që do të hetohen. Disa prej kandidatëve janë: Artur Bushi, kandidat i PS për bashkinë Krujë, Rezart Tusha, kandidat i ‘Bashkë Fitojmë’ për bashkinë Shijak si dhe Alfred Beleri, kandidat i ‘Bashkë Fitojmë’ për bashkinë Himarë. Celibashi tha gjithashtu se në qendrat e votimit nuk do të lejohet që të qëndrojë asnjë person që nuk do të ketë lidhje me zgjedhjet. Kryekomisioneri tha se nëse do të identifikohet një person që nuk ka lidhje, atëherë do të njoftohet Policia e Shtetit.
“Janë 38 kandidatë nga 23,907 kandidatë në total, kandidatë për kryetarë bashkie dhe anëtarë për këshill bashkiak të cilët KQZ bazuar në atë çfarë ata vetë kanë deklaruar këta kandidatë në formularët e tyre të Vetëdeklarimit por dhe nga indicie të marra nga partitë politike sipas rastit kemi vendosur për të kërkuar verifikim të thelluar prej organit të Prokurorisë. Janë 28 kandidatë për anëtarë të këshillit bashkiak nga 23763 në total të cilët janë dërguar dhe këta për hetim të thelluar. Sipas detyrimit që KQZ ka i ka bërë publik formularët e Vetëdeklarimit për të gjithë kandidatët, por dhe emrat e kandidatëve të cilët janë dërguar për hetim të thelluar. Janë 10 kandidatë për kryetarë bashkie nga 144 në total, të cilët janë dërguar për hetim të thelluar. Këta kandidatë kandidojnë në zonat zgjedhore të Bashkive Kuçovë, Krujë, Vau i Dejës, Shijak, Devoll, Himarë, Mallakastër, Kukës dhe Has. Kandidatët për këshilla që janë dërguar për hetim të thelluar i përkasin bashkisë Bulqizë, Mirditë, Shijak, Tropojë, Berat, Pukë, Gramsh, Tiranë, Shkodër, Vlorë, Kuçovë, Dibër, Fushë Arrëz. Nëse konstatojnë situata të tilla, do njoftojnë KQZ, zgjedhës që kanë përfunduar votimin, nuk ka asnjë arsye të ligjshme për të qëndruar në këto ambiente. Shpresoj që kjo thirrje të marrë jehonën që duhet, se ata që rrinë kur nuk kanë punë aty, lidhet me interesa të partive politike. Nuk ekziston problemi i ndryshimit të vendndodhjes së qendrave të votimit. Nuk ka vend për të pasur këtë shqetësim dhe me siguri nuk do të jetë rasti për të pasur konfuzion. Lëvizjet janë ndryshime të fraksioneve të qendrave të votimeve apo sallave të së njëjtës godinë. Kjo është situata. Secili ka vlerësimin sesa qëndron ose jo si problematikë, por në pikëpamje praktike nuk besoj se do të shkaktojë problem ditën e votimit. Çështja e përmbajtjes të materialeve propagandistike nuk është e lidhur me kompetencën e KQZ. Ajo çfarë është në kompetencën tonë është vendndodhja e këtyre posterave. Si e ndërtojnë retorikën liderët politikë, kryeministri apo kryetarë të opozitës është çështje e tyre dhe shkon përtej kompetencës tonë. E vetmja gjë që mund të themi është që të ribëjmë thirrje për vetëpërmbajtje të liderëve politikë por duhet të pranojmë që ata mendojnë se i dinë të gjitha dhe i bëjnë shumë mirë,”- tha Celibashi.
