Pas incidenteve të fundit në veri të Kosovës, ku u sulmua stacioni policor dhe objekti i komunës në Zveçan, Policia e Kosovës ka vendosur të forcojë masat e sigurisë në nivel vendi.
Në një deklaratë të shpërndarë, autoritetet njoftuan për shtimin e patrullave dhe intensifikimin e bashkëpunimit me qytetarët, me qëllim rritjen e sigurisë publike dhe parandalimin e incidenteve të mundshme.
Këto masa do të përfshijnë edhe një prani më të madhe policore në terren, veçanërisht në zonat e veriut të Kosovës.
“Me planifikimet e parapara do të ketë shtim të aktiviteteve policore për të ofruar më shumë siguri në tërë vendin, për të gjithë qytetarët pa dallim. Planifikimet operative policore do të fokusohen në rritjen e prezencës policore në terren, duke realizuar më shumë patrullime në zona më kritike, më shumë pika kontrolli dhe rritje të bashkëpunimit me qytetarët”, thuhet në njoftim.
Më tej theksohet se “policia me anë të veprimeve operative dhe atyre inteligjente do të ketë synim që të ruajë rendin e qetësinë publike, të parandalojë aktet kriminale e të hetojë e vejë para drejtësisë të gjitha ata që do të guxojnë të atakojnë sigurinë, ligjin dhe rendin kushtetues”.
