Mëngjesin e sotëm, pranë brigjeve të Durrësit, një katamaran me vela me flamur francez, i quajtur “Plume”, ngeci në cektinën e Currilave, afër zonës së njohur si “Sfinksi”.
Incidenti ndodhi rreth orës 06:10, kur anija, e nisur nga Saranda drejt Shëngjinit, u largua nga rruga e sigurt e lundrimit dhe nuk respektoi bovën sinjalizuese që paralajmëronte praninë e cektinës.
Si rezultat, katamarani preku fundin e detit dhe mbeti i bllokuar. Në bord ndodhej vetëm një person, i cili fatmirësisht shpëtoi pa lëndime.
Pas njoftimit, shërbimet e Kapitenerisë së Portit të Durrësit dhe Policia Kufitare u mobilizuan menjëherë për të ndihmuar dhe për të parandaluar dëme të mëtejshme, si për anijen ashtu edhe për mjedisin detar.
Aktualisht, pas ndërhyrjes së ekipeve të specializuara, po kryhen hetime për të përcaktuar shkakun dhe rrethanat e incidentit.
