Gjykata e Posaçme ka pranuar kërkesën e katër të pandehurve të inceneratorit të Tiranës, Silena Tola, Etleva Kondi, Alba Thoma dhe Pëllumb Abeshi, për t’u gjykuar me procedurën e zakonshme dhe për ndarjen e çështjes nga pjesa tjetër.
Gjyqtarja Elsa Ulliri gjithashtu ka miratuar kërkesën e tetë të pandehurve të tjerë për gjykim të shkurtuar, përfshirë ish-ministrin e Mjedisit Lefter Koka, Erjon Murataj, Bledar Karoli, Taulant Tusha, Namik Simixhiu, Valbona Ballgjini, Sidita Kopliku dhe Jetmir Llapaj.
Në seancën e ardhshme, prokurori Dritan Prencci do të japë konkluzionet për tetë të pandehurit, ndërsa për katër të tjerët do të vijojë gjykimi.
Seanca e radhës është caktuar për më 7 shkurt, në orën 13:00.
Dosja e inceneratorit të Tiranës kaloi për gjykim më 13 dhjetor 2024, dhe më 2 gusht, Prokuroria e Posaçme njoftoi mbylljen e hetimeve për 12 personat e akuzuar për shpërdorim detyre.
Ish-deputeti socialist Alqi Bllako, i cili gjithashtu ka qenë sekretar i përgjithshëm i Ministrisë së Mjedisit, është ndarë nga kjo çështje për shkak të akuzës për korrupsion. Çështja ndaj tij është aktualisht në fazën e dhënies së konkluzioneve nga prokuroria.
