Kryetari i Partisë së Lirisë, Ilir Meta, ka shpërndarë një mesazh në rrjetet sociale për anëtarët dhe simpatizantët e partisë.
Ai njoftoi se nesër, në orën 10:00, do të zhvillohet seanca gjyqësore në Gjykatën e Apelit, në GJKKO, për çështjen e revokimit të masës së arrestit me burg ndaj tij, të cilën e cilëson si të paligjshme.
Meta gjithashtu informoi se është njohur me disa iniciativa të paautorizuara nga ai ose spontane për të organizuar protesta para gjykatës. Ai kërkoi që askush të mos marrë pjesë në protesta, duke theksuar se veprime të tilla mund të jenë të dëmshme dhe të papërshtatshme në këtë rast.
Të dashur anëtarë dhe simpatizantë të Partisë së Lirisë!
Siç jeni në dijeni, nesër në ora 10:00, në Gjykatën e Apelit (GJKKO) zhvillohet seanca gjyqësore me objekt revokimin e masës së paligjshme të arrestit me burg të aplikuar ndaj meje prej një muaji.
Jam në dijeni të iniciativave të personave të paautorizuar nga unë apo spontane për të protestuar përpara gjykatës.
Ju bëj me dije se veprime të tilla janë të padobishme dhe të dëmshme.
Betejën time ligjore e kam bazuar në parashtrimin e gjithë të vërtetave përpara gjykatës duke denoncuar inekzistencën e provave ndaj meje në këtë proces kryekëput politik.
Në këto kushte, çdo grumbullim apo protestë para gjykatës në ditën e gjykimit i konsideroj si shpërqëndrim të opinionit publik ndaj thelbit të çështjes, ndaj ju bëj thirrje të distancoheni nga çdo iniciativë për grumbullime dhe protesta.
I juaji, Ilir Meta.
