Presidenti i Republikës së Shqipërisë, Ilir Meta ka dekretuar ditën e sotme kabinetin e ri qeveritar dhe ia ka dërguar dekretin Kuvendit të Shqipërisë.
Ky vendim i Presidentit vjen një ditë pasi Prokuroria e Përgjithshme i ktheu përgjigje Presidentit në lidhje me verifikimin e ministrave të rinj të kabinetit.
Kujtojmë se disa ditë më parë kreu i shtetit i ka dërguar një shkresë Prokurorisë së Përgjithshme, ku i kërkonte që të jepte informacion në lidhje me ministrat e rinj të qeverisë “Rama 3”.
Gjithashtu kujtojmë se Edi Rama do të jetë kryeministri i Shqipërisë për mandatin e tretë teksa zëvendësi i tij do të jetë Arben Ahmetaj.
Ajo që u vu re është se qeveria e re e Shqipërisë do të ketë mbi 70% gra ministre. Së bashku me Ramën e Ahmetajn janë kanë marrë “ok” tashmë nga Meta edhe 17 anëtarë që do të përbëjnë kabinetin qeveritar.
Tashmë pritet vetëm vetëm miratimi nga Parlamenti dhe më pas betimi i secilit prej anëtarëve të kabinetit qeveritar po tek Presidenti Meta.
Dekreti nga Ilir Meta
REPUBLIKA E SHQIPËRISË
PRESIDENTI
D E K R E T
PËR EMËRIMIN E KËSHILLIT TË MINISTRAVE
Në mbështetje të neneve 93, 95 pika 1, 96, 97, 98, dhe 99 të Kushtetutës, pas zhvillimit të zgjedhjeve të përgjithshme për Kuvendin e Republikës së Shqipërisë të datës 25.04.2021, rezultati përfundimtar i të cilave është shpallur nga Komisioni Qendror i Zgjedhjeve përmes Vendimit nr. 21, datë 13.07.2021, të Komisionit Rregullator, me propozim të Kryeministrit nr. 4281 prot., datë 11.09.2021, si dhe pas administrimit të informacionit prej organeve ligjzbatuese për verifikimin e kandidatëve të propozuar si anëtarë të Këshillit të Ministrave,
D e k r e t o j:
Neni 1
Emërimin e Këshillit të Ministrave me këtë përbërje:
1) Zoti Edi Rama- Kryeministër;
2) Zoti Arben Ahmetaj – Zëvendëskryeministër dhe ministër i Shtetit për Rindërtimin dhe Programin e Reformave;
3) Zonja Olta Xhaçka – Ministër për Evropën dhe Punët e Jashtme;
4) Zoti Niko Peleshi – Ministër i Mbrojtjes;
5) Zoti Bledar Çuçi – Ministër i Brendshëm;
6) Zonja Delina Ibrahimaj- Ministër i Financave dhe Ekonomisë;
7) Zonja Belinda Balluku – Ministër i Infrastrukturës dhe Energjisë;
8) Zonja Evis Kushi – Ministër i Arsimit dhe Sportit;
9) Zoti Ulsi Manja – Ministër i Drejtësisë;
10) Zonja Elva Margariti – Ministër i Kulturës;
11) Zonja Frida Krifca – Ministër i Bujqësisë dhe Zhvillimit Rural;
12) Zonja Ogerta Manastirliu – Ministër i Shëndetësisë dhe Mbrojtjes Sociale;
13) Zonja Mirela Kumbaro Furxhi – Ministër i Turizmit dhe Mjedisit;
14) Zonja Elisa Spiropali – Ministër i Shtetit për Marrëdhëniet me Parlamentin;
15) Zonja Edona Bilali – Ministër i Shtetit për Mbrojtjen e Sipërmarrjes;
16) Zonja Bora Muzhaqi – Ministër i Shtetit për Rininë dhe Fëmijët;
17) Zonja Milva Ekonomi – Ministër i Shtetit për Standardet e Shërbimeve.
Neni 2
Ky dekret hyn në fuqi menjëherë.
Nr. Dekretit 13213
Tiranë, më 14.09.2021
PRESIDENTI I REPUBLIKËS
ILIR META
