IdentiTek, kompania shtetërore për prodhimin e dokumenteve biometrike, ka lançuar një shërbim të ri për pajisjen me letërnjoftim elektronik në kohë të përshpejtuar.
Me një tarifë prej 3,000 lekësh, qytetarët shqiptarë mund të marrin dokumentin e identifikimit brenda 3 ditësh.
Ky shërbim synon të lehtësojë dhe përshpejtojë procesin e aplikimit, veçanërisht për ata që kanë nevojë urgjente për letërnjoftim, si emigrantët që qëndrojnë për një kohë të shkurtër në Shqipëri apo qytetarët që kanë kërkesa të menjëhershme për arsye personale, profesionale apo administrative.
Si funksionon aplikimi?
Qytetarët mund të aplikojnë në çdo zyrë të IdentiTek në të gjithë vendin, duke ndjekur këto hapa:
• Blerja e kuponit për procedurën e përshpejtuar;
• Paraqitja me dokumentin e vjetër ose vetëdeklarimin e humbjes/vjedhjes nga e-Albania;
• Kryerja e aplikimit në zyrat e IdentiTek;
• Tërheqja e kartës së re në të njëjtën zyrë ku është bërë aplikimi.
Kush mund të përfitojë?
Shërbimi është i aksesueshëm për:
• Qytetarët që pajisen për herë të parë me letërnjoftim elektronik;
• Ata që rinovojnë dokumentin e skaduar;
• Personat që kërkojnë zëvendësim për shkak të humbjes, dëmtimit apo skadimit të dokumentit.
