Ditën e sotme demokratët e zhgënjyer kanë nisur një protestë për largimin nga posti i kryetarit të Partisë Demokratike, Lulzim Bashën. Ibsen Elezi, ish-kreu i partisë Demokratike në Kukës ka shkuar te zyrat e PD-së me një pankartë ku shkruhej “Basha Boll”. Elezi në selinë blu ka pasur një përplasje me demokratët e tjerë që ndodheshin aty dhe që mbështesnin Bashën. Demokratët e kanë larguar në mënyrë agresore Elezin nga Selia Qendrore e Partisë Demokratike, pas zënkës që patën.
Kujtojmë se ditën e djeshme kreu i Partisë Demokratike, Lulzim Basha, foli për herë të parë pas përfundimit të zgjedhjeve të 25 prillit, ku partia demokratike fitoi 59 mandate dhe Partia Socialiste e cila fitoi për herë të tretë zgjedhjet me 74 mandate. Kjo është hera e dytë që Basha nuk siguron një fitore për demokratët. Basha akuzoi drejtpërdrejt kryesocialistin Rama se kishte bashkëpunuar me krimin dhe Tom Doshin për të vjedhur zgjedhjet dhe për të instaluar një regjim në Shqipëri.
