Ditën e sotme, policia e Tiranës ka bërë të mundur arrestimin e drejtorit të një nga filialet e Alpha Bank në Tiranë.
35-vjeçari i arrestuar është Florant Nako, i cili ka shfrytëzuar postin e tij si drejtor i bankës, për t’i vjedhur një klienti nga llogaria e tij 30 mijë dollarë.
Mësohet se Nako ishte nën hetim nga policia dhe mendohet se dhe është përgjuar.
Mbi 35-vjeçarin Florant Nako rëndon vepra penale “Vjedhja e kryer duke shpërdoruar detyrën”.
Njoftimi i Policisë:
Finalizohet operacioni policor i koduar “Bankieri”. Operacioni nga Seksioni për Hetimin e Krimit Ekonomik e Financiar, në bashkëpunim me Prokurorinë e Rrethit Gjyqësor Tiranë.
Ndalohet një 35-vjeçar, pasi duke shpërdoruar detyrën, ka vjedhur një shumë parash në llogarinë rrjedhëse të një klienti.
Nga Seksioni për Krimin Ekonomik dhe Financiar, në bashkëpunim me Prokurorinë e Rrethit Gjyqësor Tiranë, si rezultat i një hetimi disamujor është bërë i mundur finalizimi i operacionit të koduar “Bankieri”, në kuadër të cilit u bë kapja dhe ndalimi i shtetasit F. N., 35 vjeç, banues në Tiranë.
Ky shtetas, duke shfrytëzuar pozicionin e tij si drejtor i një filiali të një banke të nivelit të dytë, ka vjedhur në llogarinë rrjedhëse të një klienti, një shumë prej 30.000 dollarësh amerikanë.
Materialet i kaluan Prokurorisë, për veprime të mëtejshme, për veprën penale “Vjedhja e kryer duke shpërdoruar detyrën” .
