Vishwash Kumar Ramesh, 40 vjeç, është i vetmi pasagjer që ka mbijetuar nga rrëzimi tragjik i avionit të Air India, ku ndodhën 241 viktima nga 242 persona në bord.
Megjithëse ka shpëtuar me plagë të lehta në fytyrë dhe gjoks, ai mbetet i rënduar psikologjikisht nga përvoja e tmerrshme dhe ndjenja e fajit për humbjen e vëllait të tij.
I ulur në vendin 11A të Boeing 787 Dreamliner-it fatkeq, Vishwash u quajt nga mediat indiane “njeriu mrekulli” dhe “fëmija i Zotit”. Por për të, mbijetesa është një barrë e rëndë për t’u përballur.
“Nuk e di si shpëtova. I pashë të gjithë duke vdekur para syve të mi,” tha ai për mediat. Vëllai i tij Ajay, 35 vjeç, humbi jetën në aksident, dhe Vishwash përjeton dhimbjen e thellë të pafuqisë, duke thënë: “Jam mirë fizikisht, por më vret fakti që nuk arrita ta shpëtoja vëllain tim.”
Ai kishte përpjekur të rezervonte dy vende pranë njëri-tjetrit për fluturimin fatkeq AI171, por për shkak të mungesës së vendeve, u detyrua të ulej në vende të ndara.
“Nëse do të ishim ulur bashkë, ndoshta të dy do të kishim shpëtuar,” shtoi ai.
Familjarët e tij tregojnë se Vishwash kalon net të vështira, me gjumë të shqetësuar dhe makthe të përsëritura.Kushëri i tij, Krunal Keshave nga Leicester, thotë se ai “ëndërron sikur është ende në avion dhe i sheh të gjithë duke vdekur,” dhe se Vishwash nuk flet për aksidentin, por mban gjithçka brenda.
Pas aksidentit, Vishwash tentoi të kthehej në avion për të shpëtuar vëllain e tij, duke iu lutur punonjësve të emergjencës: “Vëllai im është atje dhe po digjet për së gjalli. Duhet ta shpëtoj.”
Sipas punonjësit të parë të ndihmës në vendngjarje, ai ishte i gjakosur, i çorientuar dhe në shok, por i vendosur të kthehej brenda. Më vonë, ai mbajti arkivolin e vëllait në një ceremoni në Gujarat.
Avioni u përplas në kampusin e një kolegji mjekësor në qytetin e Ahmedabadit, duke shkaktuar një nga aksidentet më të rënda ajrore në histori, ku humbën jetën 241 persona, përfshirë 52 shtetas britanikë.
Hetimet e aksidentit përqendrohen te veprimet e kapitenit Sumeet Sabharwal, i cili dyshohet se ndërpreu furnizimin me karburant në një moment paniku, ndërsa oficeri i parë Clive Kunder përpiqej të stabilizonte situatën. Regjistrimet e kutisë së zezë zbulojnë tensione dhe mungesë përgjegjësie midis pilotëve në momentet kritike.
Për Vishwash, megjithatë, mbijetesa ka një çmim të lartë emocional. Ai përballet çdo ditë me humbjen e vëllait dhe me barrën e të qenit i vetmi që shpëtoi nga një tragjedi që tronditi familje të shumta në Indi dhe Britani.
