‘Arrest në burg’ ka kërkuar prokuroria e Trianës për edukatoren Majlinda Dehiman, e cila akuzohet se dhunoi 3-vjeçaren në kopshtin privat “STINËT”, duke i thyer asaj këmbën. Edukatorja akuzohet për veprën penale ‘Keqtrajtim i të miturit’.
Kjo masë u kërkua menjëherë pas marrjes në dorëzim ditën e sotme, të procesverbalit për këqyrjen e pamjeve filmike (usb), ku shfaqeshin pamjet e dhunës. Ndërkohë, sot qytetarë të ndryshëm, janë ngritur në protestë, ndërsa kërkojnë burg për edukatoren dhe kontrolle në të gjitha kopshtet private.
NJOFTIMI I PROKURORISE
Prokuroria Tiranë kërkon ‘Arrest në burg’ për shtetasen M.D. për Veprën Penale ‘Keqtrajtim i të miturit’. Prokuroria pranë Gjykatës së Juridiksionit të Përgjithshëm Tiranë kërkoi caktimin e masës së sigurimit “Arrest në burg” parashikuar nga neni 238 i K.Pr.Penale, për personin nën hetim M. D., për veprën penale “Keqtrajtim i të miturit”, të parashikuar nga neni 124/b/1 i K.Penal.
Kjo masë u kërkua menjëherë pas marrjes në dorëzim ditën e sotme, më dt. 09.11.2023, të procesverbalit për kqyrjen e pamjeve filmike (usb), i cili është mbajtur më dt. 08.11.2023. Me shkresën nr. 9538/1 prot., dt. 08.11.2023, protokolluar në Prokurori me nr. 10983 prot., dt. 09.11.2023, Instituti i Mjekësisë Ligjore, ka përcjellë aktin e ekspertimit mjeko-ligjor.
Prokuroria pranë Gjykatës së Juridiksionit të Përgjithshëm Tiranë, po kryen veprimet e tjera procedurale për dokumentimin e faktit, në kuadër të procedimit penal nr. 7527, i regjistruar pas kallëzimit mbi bazën e materialeve të referuara nga Drejtoria e Policisë së Qarkut Tiranë, Komisariati i Policisë nr.1, për Veprën Penale “Keqtrajtimi i të miturit”, parashikuar nga neni 124/b i Kodit Penal.
