Gjykata e Shkodrës ka vendosur masën e sigurisë “arrest me burg” për vëllezërit Arjon dhe Klisman Hasaj, të akuzuar për ekzekutimin e 33-vjeçarit Ramazan Mataj në Dragoç të Postribës, më 4 janar.
Gjatë seancës, të dy të pandehurit nuk dhanë asnjë deklaratë përpara gjyqtares Irida Barkaj. Sipas dëshmisë së tyre, shkak për ngjarjen ishte lidhja e Matajt me motrën e tyre.
Ata kanë pretenduar se viktima kishte ndikuar në prishjen e dy martesave të saj dhe kishte shpërndarë materiale intime të vajzës.
Pala mbrojtëse kërkoi masën e sigurisë “arrest shtëpie” për Klisman Hasaj, por kjo kërkesë u refuzua nga gjykata, duke e konsideruar të ligjshëm arrestimin dhe duke lënë në fuqi masën e paraburgimit për të dy vëllezërit.
