Policia e Kuçovës ka vënë në pranga një 34-vjeçar nga Tirana, i cili ishte shpallur në kërkim tre ditë më parë, në kuadër të operacionit policor të koduar “Kultivimi”. Ky operacion synon identifikimin dhe ndëshkimin e autorëve të përfshirë në një rast të kultivimit të bimëve narkotike në fshatin Mendrak, ngjarje e ndodhur në vitin 2021.
I arrestuari, shtetasi E. M., u kap falë bashkëpunimit të ngushtë mes strukturave të Policisë dhe Prokurorisë së Rrethit Berat, si dhe bazuar në të dhëna të siguruara nga inteligjenca policore.
Sipas informacioneve zyrtare, E. M. dyshohet se ka vepruar në bashkëpunim me dy shtetas të tjerë: Sh. H., i cili u arrestua më 13 maj 2025, dhe B. Ll., që vijon të jetë në kërkim nga autoritetet. Të tre akuzohen për kultivimin e bimëve narkotike të llojit Cannabis Sativa, në territorin e fshatit Mendrak.
Dosja hetimore i është referuar tashmë Prokurorisë pranë Gjykatës së Shkallës së Parë të Juridiksionit të Përgjithshëm Berat, për vijimin e procedurave ligjore.
