Ditën e sotme është ndarë nga jeta ish-zyrtari i LSI, Ilir Dashi. Ende nuk dihen shkaqet e ndarjes së parakohshme nga jeta të Dashit, ndërsa kolegë dhe miq kanë konfirmuar lajmin duke shprehur ngushëllimet për vdekjen e tij.
Presidenti i Shqipërisë, Ilir Meta ka dhënë një mesazh ngushëllimi për ndarjen nga jeta të ish-zyrtarit të LSI, Ilir Dashi.
Meta thotë se në kulmin e energjive dhe angazhimeve të shumta vdiq miku i paharruar.
Ai ngushëllon familjarët, miqtë e kolegët.
Postimi i plotë i Presidentit Meta:
I prekur thellë nga humbja e parakohshme e mikut të paharruar, Ilir Dashi.
Shumë dhembje për ndarjen e tij nga jeta, në kulmin e energjive dhe angazhimeve të shumta.
Ngushëllimet më të ndjera familjarëve, miqve dhe kolegëve të tij!
Të prehet në paqen e merituar!
Prej kohësh Ilir Dashi ishte zhvendosur në Afrikën e Jugut së bashku me familjen. Hapat e parë të karrierës së tij i nisi si aktor ku mori pjesë në disa filma. Më pas vazhdoi duke u angazhuar në disa biznese ndërsa më tej i hyri politikës.
Ai e vazhdoi jetën politike si kryetar i LSI në Tiranë, drejtor në Bashkinë Tiranë, ish-drejtor i QSUT, më vonë drejtor i Hekurudhave.
Dashi gjithashtu ka qenë i angazhuar vite më parë në kinematografinë shqiptare, ku ka luajtur në disa role filmash.
