Ditën e sotme ka ndërruar jetë nga COVID-19 Kryekomisari Florian Pema, shefi i Anti-drogës në Drejtorinë e Përgjithshme të Policisë së Shtetit.Punonjësi i lartë i Policisë së Shtetit, 44-vjeçari Florian Pema ka ndërruar jetë në banesën e tij disa ditë pasi ishte prekur nga koronavirusi.
Lajmin e kishte bërë të ditur më herët zëdhënsja e OFL-së, Eljes Breca ku shkruante:
Sot, Policia e Shtetit humbi një nga djemtë dhe oficerët më të mirë të saj.
𝗙𝗹𝗼𝗿𝗶𝗮𝗻 𝗣𝗲𝗺𝗮, la në dhimbje të thellë bashkëshorten, djalin, të afërmit, të njohurit dhe kolegët por la dhe gjurmë të ndritshme të virtyteve të tij.
Një ikje e papritur dhe e shpejtë që la bosh jo vetëm skrivaninë ku ai punonte me orë të zgjatura, për një shoqëri më të mirë për djalin e tij dhe për djemtë dhe vajzat tuaja, por edhe zemrat e kolegëve që i kishte fituar me mirësinë e tij të rrallë.
Na fal që nuk të ndihmuam dot Florí, që ndoshta nuk bëmë aq sa duhet për jetën tënde të çmuar.
Zoti të dhëntë ty paqen që meritojnë të drejtët.
