Rritja ekstreme e temperaturave ka sjellë një fluks të shtuar pacientësh në urgjencën e Qendrës Spitalore Universitare “Nënë Tereza” në Tiranë.
Sipas stafit mjekësor, shumica e rasteve kërkojnë ndihmë për shkak të humbjes së ndjenjave, problemeve kardiake dhe gjendjeve të rënda të dehidrimit.
Mjekja Daniela Teferiçi shpjegon efektet që temperaturat e larta kanë në organizëm: “I nxehti shkakton dehidrim. Djerësitje të theksuar. Mekanizëm që mban të ulur temperaturën e trupit por në mënyrë të shtuar humbet kripëra të domosdoshme për funksionim të mirë të organizimit. Humbja e ujit çon në tharje të lëkures, gojës dobësi dhe kur ekspozohemi edhe më shumë në të nxehtë arrijmë gjendje konfuzioni ose humbje koshience”
Për të shmangur komplikacionet, mjekët apelojnë për konsum të rregullt të lëngjeve, edhe nëse nuk ndjeni etje. Kjo ndihmon në ruajtjen e ekuilibrit elektrolitik dhe parandalon efektet e rënda të dehidrimit. Veçanërisht kujdes duhet të tregojnë pacientët me probleme të zemrës.
“Te pacientët me sëmundje kardiake bëjnë hipotension, ndodh disletacioni i enëve të gjakut që të djersisim sa më shumë, të eliminojmë nxehtësi, çon në ulje të tensionit arterial se janë në terapi,” thotë më tej Teferiçi për Abcnews.
Ndërkohë, për personat që ndodhen në plazhe, një tjetër rrezik vjen nga futja e menjëhershme në ujë të ftohtë pas ekspozimit të gjatë në diell.
Mjekja paralajmëron: “Ndryshimi i menjëherëshëm I temperaturës nga I nxehti futesh në ujë shakton vazospazmë e arterieve koronare. Ndodhe spazma e arterieve koronare. Në atë moment të futjes në ujë të ftohtë nëse ndodh ky ngushtim, I arterieve koranare me pasojë infarktin, ose kur bën vdekje të papritur nga mbyllje e enëve të gjakut. Normalisht ndodh tek personat që mund të kenë një sëmundje ndoshta të paditur, një ngushtim të arteries ose të rinj që konsumojnë lëndë narkotike persona të tjillë janë shumë të prirur”.
Përballë kësaj vale të të nxehtit, që pritet të vazhdojë, mjekët u bëjnë thirrje të gjitha grupmoshave të shmangin lëvizjet në orët e pikut dhe të qëndrojnë sa më shumë në ambiente të freskëta për të mbrojtur shëndetin e tyre.
