Një ngjarje rëndë ka ndodhur në fshatin Verbas në Patos ku një i moshuar ka humbur jetë si pasojë e një zjarri që ka përfshirë banesën e tij.
Mësohet se Sabri Serdari nuk ka mundur dot të dalë nga flakët prej banesës dhe për pasojë ka gjetur vdekjen.
73-vjeçari ishte i paralizuar dhe nuk mund të lëvizte. Kur ka rënë zjarri në shtëpi ai ishte vetëm, pasi e shoqja kishte 2 orë që ishte larguar. Fëmijët e tij jetonin jashtë vendit. Fqinjët shprehen se e kanë parë zjarrin shumë vonë dhe nuk kishin mundësi ta shpëtonin. Sipas tyre autoritetet kanë shkuar shumë vonë për të shuar zjarrin.
Policia ishte shumë me vonesë. Ai ishte i sëmurë dhe i shtrirë brenda. Flaka e mbyti menjëherë. Gruaja e tij nuk ishte aty, kishte ikur prej 2 orësh. Nuk dëgjuam asgjë. Vetëm kur pamë flakën dhe nuk arritëm dot ta shpëtonim”, shtoi një fqinj për “Abc News”. “Fëmijët i kanë jashtë. Ishte në krevat nuk lëvizte. Ne e pamë nga fundi zjarrin”, tha një tjetër.
Gjithashtu “Abc News” ka siguruar video nga banesa e shkrumbëruar tashmë.
Njoftimi i policisë:
Informacion paraprak
Sot rreth orës 12:30, në fshatin Verbas , Patos, në banesën e shtetasit S. S., ka rënë zjarr, ku si pasojë ka ndërruar jetë shtetasi S. S., 73 vjeç, i cili ndodhej brenda në banesë.
Grupi hetimor po punon për zbardhjen e plotë të rrethanave të ngjarjes.
