Policia e Madridit ka arrestuar ditën e sotme një shtetas shqiptar, të dënuar me 10 vite burg.
Bëhet fjalë për 62-vjeçarin, Luan Bundo nga Tirana.
Ky i fundit akuzohet se ka ndihmuar një shtetas për të shkuar në Australi, në këmbim të 13 mijë eurove.
Fillimisht ata kanë shkuar në Maqedoni ku janë pajisur me viza.
Më pas udhëtimi ka vazhduar në Indonezi, dhe më pas nga shteti aziatik janë transportuar me varkë për në Australi.
“Dosja.al” bën me dije se shtetasi për të cilin akuzohet Bundo është Mensur Prençi nga Dibra.
Prej 5 vitesh, familjarët nuk kanë asnjë informacion për fatin e 32-vjeçarit.
Ndërkohë i arrestuari ka qenë administrator i një agjencie sigurimesh.
Mësohet se nëpërmjet Maqedonisë dhe Bullgarisë, klandestinët pajiseshin me vizë turistike për në Indonezi.
Bundo njoftoi familjarët e Prençit se ai kishte mbërritur shëndoshë e mirë në Australi dhe që nga ai moment nuk dinë asgjë për të.
Njoftimi i policisë
Madrid, Spanjë
Shkëmbimi në kohë i informacionit mes Interpol Tirana dhe Interpol Madridit vë në pranga një shtetas të dënuar me 10 vite burg Policia e Shtetit ka marrë informacion në rrugë operative se një person i shpallur në kërkim ndërkombëtar mbrëmjen e djeshme ndodhej në një ambient, në Madrid të Spanjës. Pas verifikimeve të shpejta rezultoi se të dhënat, i përkisnin personit të shpallur në kërkim ndërkombëtar. Falë shkëmbimit shumë të shpejtë të informacionit ndërmjet Interpol Tiranës, Interpol Madridit dhe Zyrës Ndërlidhëse të Policisë Spanjolle, u bë e mundur arrestimi në Madrid, i shtetasit Luan Bundo, 62 vjeç, nga Tirana. Përmbledhje e ngjarjes së ndodhur
Shtetasi Luan Bundo, i ka ofruar dhe dhënë ndihmë për kalimin e kufirit në mënyrë të paligjshme një shtetasi, për të shkuar në Australi. Këtë ndihmë ai e ka ofruar dhe dhënë kundrejt shpërblimit të kërkuar prej 13.000 eurosh. Shtetasi Bundo së bashku me shtetasin M.P, fillimisht kanë shkuar në Maqedoni ku janë pajisur me viza për në Indonezi dhe më pas nga Indonezia për në Australi, janë transportuar nga një shtetas indonezian me peshkarexhë.
Gjykata e Rrethit Gjyqësor me vendim, datë 19.12.2016 ka shpallur fajtor shtetasin Bundon për veprën penale “Ndihmë për kalimin e paligjshëm të kufirit” dhe e ka dënuar me 10 vite burgim. Interpol Tirana në bashkëpunim me Interpol Madridin po vijojnë proceduarat për ekstradimin e shtetasit të arrestuar drejt Shqipërisë.
