Tërmeti i 26 nëntorit i cili la pas 51 viktima, ishte më i forti i 30 viteve të fundit.
Shqipëria ka përjetuar edhe në të shkuarën tërmete shkatërrues, siç ishte ai i vitit 1979 në Shkodër, 7.2 ballë.
Një ish-punonjës në sektorin e shëndetësisë, Prel Doshi, ka rrëfyer për “Shqiptarja.com”, angazhimin e qeverisë së atëhershme, për kapërcimin e situatës.
Ai thotë se për rindërtimin e Shkodrës u ngrit i gjithë populli dhe për 4 muaj qyteti me gjithë fshatrat u rimëkëmb.
“Mbaj mend tërmetin që ka rënë në Shkodër në ’79. Ka qenë ditë e diel. Mbaj mend që të nesërmen shkumë aty. Kam qenë punonjës si gjeometër për mjekësinë, bëmë një mbledhje me drejtorin, Fadil Mustafa dhe pamë gjendjen e të gjithë fshatrave të Shkodrës. Kishte bërë dëme jashtëzakonisht të mëdha. Kjo gjendje u rregullua se u ngrit populli dhe fshatrat u bënë të reja. Ishte tragjedi e rëndë, por u ndërtua në një kohë rekord. Bushtam, Oblik, Velipojë, Dajc të gjithë. Ka qenë tragjedi shumë e madhe, edhe njerëz patën vdek dhe bëri dëme të mëdha. Shëndetësia ka qenë e organizuar. Dolëm menjëherë. U çuan të gjithë. Për tre katër muaj i bëmë më të mira se sa ishin. Atëherë ka patur godina shumë të vjetra. Për fat të mirë ra në mal”, tha ai.
Përsa i përket reagimit të shtetit, Doshi u shpreh se ka qenë më i mirë atëherë.
“Reagimi ka qenë më i mirë atëherë, ka pasur mangësi e ngadalësi. Kanë pasur mundësi me shpëtuar ata nën rrënoja. Qeveria duhej të ishte më gati. Nuk përjashtohet se kanë kontribuar, por atëherë kanë punuar më shumë se punoj më shumë populli se qeveria”, shtoi më pas i moshuari.
