Një çift të moshuarish në Korçë kanë rënë pre e disa grabitësve mbrëmjen e djeshme.
Të maskuar dhe me armë autorët kanë hyrë në banesën e të moshuarve dhe u kanë bërë presion, që t’i japin lekët.
Ngjarja është regjistruar në lagjen Nr.3 të qytetit. Siç shkruan “Balkanweb”, autorët kanë lidhur të moshuarit në krevat, pas kundërshtimeve.
Ata kanë qëlluar në kokë me qytën e pistoletës Foni Rrapon, ndërsa gruan e tij, Afërditën e kanë goditur në krah dhe në këmbë.
Nga dëshmitë e çiftit, mësohet se autorët kanë marrë rreth 1 milion lekë të vjetra.
“Ishim duke ngrënë bukë. Ishte 8 pa 10. Dy persona me maskë, armë dhe thikë u futën menjëherë brenda nga dera e banesës ngjitur. Ishin me armë, pistoletë, kishin dhe një thikë. Na kërcënuan dhe goditën, kërkonin lek, më morën pensionin dhe kursimet. Mua më goditën me qytën e pistoletës në kokë ndërsa gruan Afërdita në krahë dhe këmbë. Ime shoqe është në spital. E goditën shumë me shishe dhe mua më goditën. Gjatë gjithë kohës bërtisnin lekët, lekët. Në fund iu thashë merri lekët e pensionit. Thoshin të tjerat. Në fund iu thashë merri lekët e rezervës. Këto kisha unë. Afro 1 milion mund të ishin. Mua më lidhën dorën se unë desha që të dilja, mirëpo dera ishte e mbyllur dhe më zunë atje. Ata do kenë hyrë nga shtëpia këtej, ngjitur. Nuk kemi ndjerë asgjë kur hynë. Ishin të maskuar komplet. Vetëm leka, leka. I thashë është një unazë në sirtar, merreni i thashë. Thoshin që kemi ardhur nga Elbasani, e përdorën pak dialektin por jo tamam. Ndoshta për të humbur gjurmët. Mos lajmëro më tha mua”. tregon i moshuari.
Pas grabitjes autorët u larguan në drejtim të paditur, ndërsa të moshuarit u dërguan në spital për të marrë ndihmën mjekësore.
Grupi hetimor ndërkohë ka nisur punën për identifikimin dhe arrestimin e autorëve.
Njoftimi i policisë
“Më datë 14.10.2019, rreth orës 21.45, në lagjen nr.3, dy persona ende të pa identifikuar, dyshohet se njëri kishte armë zjarri tip pistoletë kanë hyrë në banesën e shtetasve F.R dhe A.R, rreth 85 vjeç, duke ushtruar dhunë psikologjike, kanë marrë një sasi lekësh dhe më pas janë larguar me shpejtësi.
Dy të moshuarve u është dhëna ndihma e parë mjekësore, pa probleme për jetën. Grupi hetimor po punon për identifikimin dhe kapjen e autorëve, si edhe zbardhjen e plotë të rrethanave të ngjarjes.”
