Edison Muceku, 33 vjeç, i kërkuar nga SPAK dhe Policia e Shtetit për vrasje të mbetur në tentativë, është arrestuar në Angli.
Sipas dokumenteve të Gjykatës së Ekstradimeve në City of Westminster, autoritetet britanike kanë nisur procedurat e ekstradimit të tij drejt Shqipërisë. Muceku kërkohet nga drejtësia shqiptare për bashkëpunim në tentativën për të vrarë Hamza Terziun më 21 maj 2020 në Bulqizë.
Gjatë seancës në gjykatë, Muceku deklaroi se dëshiron të kthehet vullnetarisht në Shqipëri për t’u përballur me akuzat.
Autoritetet shqiptare dyshojnë se ai është pjesë e një grupi kriminal të udhëhequr nga Hektor Xheçuka, i njohur ndryshe si “Tor Xheçuka” nga Burreli. Ky grup kriminal akuzohet për disa krime të rënda, përfshirë edhe përfshirjen në eliminimin e Hamza Terziut.
Në bazë të dosjes së SPAK, Hektor Xheçuka është një emër i lidhur me grupin kriminal të Ervis Martinajt. Ai dyshohet të jetë një vrasës me pagesë dhe të ketë planifikuar vrasjen e Durim Bamit, plan i zbuluar pas analizimit të bisedave të aplikacionit SkyECC. Sipas hetimeve, Xheçuka kishte qëlluar me armë drejt banesës së Hamza Terziut si paralajmërim.
Operacioni “Revanshi” dhe hetimet për këtë rast zbuluan një rrjet të gjerë të përfshirë në këtë ngjarje. Gjykata e Posaçme ka lëshuar urdhër-arreste për disa persona, përfshirë Hektor Xheçukën, Albert Zajën, Edison Mucekun, Florenc Kelmendin, Ardit Gjokrosën dhe Tor Xheçukën. Në dosjen hetimore thuhet se Ardit Gjokrosa është personi që ka treguar vendndodhjen e shtëpisë së Hamza Terziut, mbi të cilën më pas është qëlluar me breshëri plumbash.
Aktualisht, Hektor Xheçuka dyshohet se fshihet në Dubai dhe konsiderohet një nga personat më të rrezikshëm, për shkak të përfshirjes në disa ngjarje kriminale me pagesë. Autoritetet shqiptare vijojnë bashkëpunimin me partnerët ndërkombëtarë për kapjen dhe ekstradimin e të kërkuarve. /Top Channel
