Kandidati i koalicionit ‘Bashkë Fitojmë’ për Bashkinë e Hasit, Miftar Dauti, denoncoi mbrëmjen e djeshme një skandal në ku sipas tij djemtë e kryetarit të bashkisë po shpërndajnë pako me ndihma për të blerë vota. Dauti publikoi dhe pamje nga veprimet që po ndërmernin personat në fjalë dhe ditën e sotme ka treguar për Fax News detaje të reja.
Dauti u shpreh se pamjet me video tregojnë qartë se si dy djemtë e Mulajt marrin pakot nga magazina e bashkisë, për ti shpërndarë kundrejt blerjes së votave.
“Filmimi është i qartë, ishin dy djemtë e tij dhe një punonjës i bashkisë, njoftova policinë dhe kërkova që të hapej furgoni. Është hapur vetëm në orën 03 të mëngjesit, gjetëm 21 pako që vinin nga rezervat e shtetit, të cilat kishin letra dhe ushqimore.
Ai ka denoncuar veten edhe me një postim që ka bërë, pakot e rezervave të shtetit, nga djemtë e tij, nuk shpërndahen në 10 apo 11 të darkës. Bashkia ka mjetet e veta sa të dojë, pse djemtë e tij ngelën që të shpërndajnë pako?
Është kapur me presh në dorë, ska lidhje tjetër. Ata kanë ardhur nga Anglia vetëm për atë punë, që të ndihmojnë në këtë mënyrë në fushatë. Vajza i punon te elektriku, dhe kanë vendosur këtë muaj 300 shtylla të reja, në ditë pushimi vajza e tij ka shkuar në një fshat, tek pull vetëm dhe është futur familje më familje.
Mbajtëm furgonin me njerëzit tanë derisa erdhën mediat, ku u vërtetua ajo që kishim denoncuar, ishin pako të dyshimta që të shpërndahen në fushatë janë të ndaluara”, tha Dauti në Fax News.
I pyetur nga gazetarja Rovena Neziri nëse do ta referojë çështjen në prokurori, Dauti tha se të gjitha denoncimet e bëra publike do të ndiqen në rrugë ligjore.
