I ftuar në emisionin “Të Paekspozuarit” në MCN TV, gazetari Artan Hoxha ndau detaje shqetësuese nga dosja e SPAK-ut,me 50 urdhër-arreste të lëshuara. Një nga rastet më tronditëse që u diskutua ishte ai i gjyqtares Saida Dollani, e cila u përball me presione ekstreme dhe shantazhe nga figura të krimit për të hequr dorë nga procesi gjyqësor i Emiljano Shullazit.
Artan Hoxha tregoi se si një person i afrohet bashkëshortit të gjyqtares në një lokal dhe i vë një pistoletë në gojë, duke i kujtuar atij se kishte dy fëmijë që jetonin në Francë. “Një nga episodet në hetim është ai i bashkëshortit të një gjyqtareje të Gjykatës së Posaçme të Apelit. Për ta detyruar që të hiqte dorë nga procesi i Shullazit, i shkon një person dhe i vendos pistoletën në gojë,” rrëfeu Hoxha në emision.
Pavarësisht presionit të vazhdueshëm, gjyqtarja Dollani nuk u përkul para kërcënimeve dhe refuzoi çdo tentativë për të korruptuar, duke mos hequr dorë nga procesi. “Duke parë që ajo gjyqtare nuk po hiqte dorë, duke u bindur që nuk kishte pranuar të korruptohej prej tyre, sepse ata ose të blejnë ose të korruptojnë. Ajo nuk pranonte as të merrte ofertën, refuzonte të gjithë tentativat për ta korruptuar dhe as nuk jepte dorëheqjen nga procesi,” theksoi Hoxha.
