Gjykata e Apelit të Tiranës ka lënë të lirë Olsi Qalliajn, një nga personat e arrestuar në muajin mars të 2019-ës, për vrasjen e menaxherit të VIP-ave, Jurgen Kurtin.
Siç raporton “Shqiptarja.com”, vendimi është dhënë nga treshja e gjyqtarëve, Alaudin Malaj, Elbana Lluri dhe Gert Shala.
Nga “Arrest me burg”, masa për Qalliajn është zëvendësuar me “Detyrim paraqitje”.
Përfaqësuesi i Prokurorisë së Apelit, Dritan Peka, ka kërkuar lënien në fuqi të masës në Shkallën e Parë, mirëpo treshja e gjyqtarëve ndryshoi vendimin.
Po këto gjyqtarë liruan nga burgu “ të fortin” e Tiranës, Gjergj Cukalin, i cili akuzohet për vrasjen e ish-efektivit Arben Bilali.
Aktualisht, për ekzekutimin e Jurgen Kurtit, në qeli ndodhet Elsi Leventi, ndërsa Klodian Bane është në kërkim.
Olsi Qalliaj është personi që ka përmendur për herë të parë emrin e Klodian Banes dhe ka orientuar policinë, drejt zbulimit të autorëve të vrasjes së Kurtit.
Gjatë dëshmisë së tij, Qalliaj tregoi se ka njohje me Leventin dhe Banen.
Për Leventin, Qalliaj ka thënë se ka marrëdhënie të mira shoqërore, pasi kanë bërë bashkë gjimnazin, por janë njohur edhe më herët në Patos.
Grupi Hetimor ndërkohë ka dyshime se të rinjtë kanë marrë 30 mijë euro për ekzekutimin e Kurtit, ndërsa porositësi nuk është zbuluar ende.
