Kledis Deda, babai i një fëmije humbi jetën mbrëmjen e djeshme në një aksident fatal në aksin rrugor Elbasan-Bradashesh. Një makinë tip ‘Volkswagen’ i ka ndërprerë rrugën një minibusi e për pasojë janë përplasur me njëra-tjetrën gjatë këtij aksidenti.
Si pasojë janë plagosur 7 persona, ndërsa Deda ndërroi jetë. 26 vjeçari ishte pasagjer në makinën tip ‘Volkswagen’, ndërsa është plagosur dhe drejtuesja e kësaj makine, me iniciale F.B. Gjithashtu kanë mbetur të plagosur dhe 5 pasagjerë të minibusit.
Të plagosurit u nisën menjëherë në spitalin rajonal të Elbasanit për ndihmë mjekësore. Minibusi ishte nisur nga Korça me destinacion Tiranën. Grupi hetimor po vijon punën për zbardhjen e plotë të shkaqeve të këtij aksidenti.
Gjatë vitit 2020, sipas INSTAT, numri i të vdekurve nga aksidentet rrugore ishte 168 persona nga 203 persona në të njëjtën periudhë të një viti më parë.
Numri i aksidenteve vitin e kaluar shënoi rënie me gati 18 %, krahasuar me të njëjtën periudhë të një viti më parë për shkak të karantinës që vendosi qeveria, gjatë së cilës nuk lejohej qarkullimi me makina.
Referuar raportit të publikuar nga INSTAT numërohen 1121 aksidente rrugore nga 1363 aksidente të ndodhura gjatë vitit 2019.
Edhe numri i të aksidentuarve gjatë vitit 2020 shënoi rënie me 21.9 %. Konkretisht u aksidentuan 1451 persona nga 1857 persona në të njëjtën periudhë të vitit 2019.
/Gazetareforma.com/
