Kreu i PD-së Sali Berisha vazhdon të mos e pranojë humbjen në zgjedhjet vendore të 14 Majit dhe të akuzojë qeverinë për blerje të votave.
Teksa ishte në një konfernencë për shtypin, ish-kryeministri Berisha deklaroi se bashkëpunëtorë në këtë krim është edhe Policia e Shtetit. Duke përmendur disa shembuj, kreu i PD-së zbuloi se në Shkodër, eksponentë të PD u kërcënuan në mënyrën më të egër prej tyre, u ofruan deri në 20 milionë lekë për komisionerë, nga 10 mijë euro për komisionerë.
Në Lezhë, nën mbrojtjen e Policisë së Lezhës, bandat shpërndanë para gjatë gjithë natës në zonat e ndryshme të rrethit të Lezhës. Po kështu, eksponentë të PD-së ranë pre e atentateve të organizuara për eliminimin e tyre, në Vaun e Dejës, në Lezhë, etj. Në Mamurras, tha më tej Berisha, bandat shpërndanë deri në 600 euro votën.
Ish-kryeministri tha ndër të tjera se bandat e ardhura nga Dubai në Durrës dhe rrethe të tjera, diktuan vullnetin e qytetarëve nën mbrojtjen e policisë.
“Farsa elektorale maj 2023, njërin prej aspekteve më të shëmtuara dhe kriminale kishte shkrirjen në një të bandave, të vrasësve dhe trafikantëve me Policinë e Shtetit në veprimin e tyre terrorizues, kriminal ndaj zgjedhësve dhe qytetarëve.
Bandat u bënë një apo ishin tërësisht nën ombrellën e policisë. Ndaj tyre, narkopolicia jo vetëm që nuk mori masa, por u mor me inskenime të turpshme për opozitarët, në një kohë kur kamionët me euro disponoheshin dhe qarkullonin në krahun e narkoqeverisë kundër zgjedhësve.
Në Shkodër, eksponentë tanë të PD u telefonuan nga banditët, u kërcënuan në mënyrën më të egër prej tyre, u ofruan gjer në 20 milionë lekë për komisioner, nga 10 mijë euro për komisioner. Në Lezhë, nën mbrojtjen e Policisë së Lezhës, bandat shpërndanë para dhe terror gjatë gjithë natës në zonat e ndryshme të rrethit të Lezhës. Diku, diku janë të filmuara dhe aty duken makinat e bandave dhe makina e policisë që u rri në krahun tjetër për të garantuar veprimtarinë e tyre kriminale. Bandat e kthyera nga Dubai, në Durrës dhe rrethe të tjera, në Elbasan dhe vende të tjera, diktuan nën mbrojtjen e policisë, vullnetin e qytetarëve. Eksponentë të PD-së u bënë pre e atentateve të organizuara për eliminimin e tyre, në Vaun e Dejës, në Lezhë, etj. Bandat pushtuan qendrat e votimit, siç është rasti i Velipojës. Në Mamurras, ato shpërndanë gjer në 600 euro votën. Të gjitha këto haptas, sepse kishin mbrojtjen e narkopolicisë. Në Nikël, vrasës e trafikantë bllokuan qendrat e votimit, vunë në presion të madh komisionerët, kurse narkopolicia arrestonte një person me një makinë dhe e mashtronte opinionin publik shqiptar se ai po blinte vota, në një kohë kur ai nuk kishte as edhe një qindarkë me vete. Pavarësisht se nuk kishte në makinë asnjë qindarkë, komunikata e policisë thoshte se u kap duke blerë vota. Si e si të krijojnë zhurmën për blerjen e votave nga opozita dhe jo nga qeveria.
Edhe numri i policisë, atë ditë janë bërë qindra thirrje nga opozitarët. Policia ose nuk përgjigjej, ose u thoshte: paraqiteni me shkrim ankesën, në një kohë kur qendra e votimit ishte e pushtuar”, deklaroi Berisha.
