Përgjegjësi i kompanisë ku humbi jetën punëtori gjatë montimit të një skene në Shëngjin më 19 korrik, Zef Shtjefni, do të mbahet nën masën e sigurisë “arrest në shtëpi”.
Pas arrestimit nga policia, 64-vjeçari u paraqit para Gjykatës së Lezhës, ku seanca u zhvillua me dyer të mbyllura.
Gjykata pranoi kërkesën e prokurorisë dhe e konsideroi të ligjshëm arrestimin, duke i vendosur Shtjefnit masën e “arrestit në shtëpi” për shkak të “shkeljes së rregullave të sigurisë në punë”.
Ngjarja tragjike ndodhi pasditen e së shtunës, kur punëtori 32-vjeçar, Zef Lorenci, po montonte skenën për një koncert në shëtitoren “Willson” në Shëngjin.
Ai u godit aksidentalisht nga një rrjedhje elektrike, duke humbur ekuilibrin dhe rënë nga një lartësi prej 6 metrash, duke pësuar plagë të rënda që i morën jetën.
