Dy turiste të huaja, njëra gjermane e tjetra polake janë zhdukur mes Alpeve Shqiptare, prej 5 ditësh.
Lajmin e ka bërë të ditur Drejtori për Parqet Kombëtare në Mal të Zi Admir Lalic, i cili bën apel që kush ka informacion të njoftojë autoritetet.
“E gjitha që dimë është se ato janë futur në Mal të Zi përmes Shqipërisë në vendkalimin Vermosh me makinën e tyre në 13 gusht. Më 14 gusht ato kanë qenë në kontakt me familjet e tyre dhe që prej asaj kohe janë zhdukur. Makinën e tyre e gjetëm në një parking në komunën e Plavës”, ka shkruar Lalic në rrjetin social Facebook.
Nëpërmjet këtij postimi, ai kërkon ndihmë që të nisin kërkimet edhe nga njerëz të zakonshëm për t’u ardhur në ndihmë dy turisteve, ose për të dhënë informacion nëse i kanë parë së fundmi.
Nga mediat mësohet se ditën e djeshme është gjetur makina me të cilën udhëtonin dy turistet, por shumë larg vendit nga ku ato kishin kontaktet e tyre.
E ditur bëhet gjithashtu se dy turistet kontaktin e tyre të fundit e kanë patur në Vermosh, por makina me të cilën ato udhëtonin është gjetur matanë kufirit, në Plavë të Malit të Zi.
