Ish-kryeministri i Kosovës, Ramush Haradinaj ka reaguar për tensionet e krijuara në veri të vendit, pas vendosjes së reciprocitetit të targave me Serbinë. Haradinaj e ka quajtur atë që po ndodh të papranueshme dhe ka shprehur mbështetje për Policinë e Kosovës dhe institucionet e vendit që mbrojnë rendin dhe ligjin. Më tej Haradinaj ka kërkuar që Prishtina të mos bjerë pre e provokimeve të projektuara në Beograd dhe Moskë.
Ai gjithashtu i ka bërë thirrje Brukselit të ndërhyjë te Beogradi zyrtar dhe të kërkojë që të mos provokojë situatën në veri, por të zbatojë marrëveshjet e nenshkruara.
“Pavarësisht se si janë zhvilluar gjërat, se si është marrë vendimi për targat, ajo që po ndodh në veri të vendit është e papranueshme.
E mbështes fuqishëm Policinë e Kosovës dhe institucionet e vendit të cilat janë vënë në mbrojtje të rendit dhe të ligjit.
Provokimet e serbëve në veri janë të projektuara në Beograd dhe në Moskë, e Prishtina, duke mos rënë pre e këtyre provokimeve, duhet të jetë e vendosur në mbrojtje të qenësisë së saj.
Njëkohësisht kërkoj nga Brukseli që të ndërhyjë te Beogradi zyrtar dhe të kërkojë prej tij që të mos e provokojë situatën në veri por t’i zbatojë marrëveshjet e nënshkruara!“, shkruan Haradinaj.
