Ditën e sotme mbushen plot 9 vite nga vrasja e 4 protestuesve në bulevardin “Dëshmorët e Kombit”.
Si çdo vit, edhe gjatë ditës së sotme u zhvilluan homazhe për viktimat, Ziver Veizi, Hekuran Deda, Faik Myrtaj dhe Aleks Nika.
Pas marshimit, familjarët e viktimave vendosën kurora me lule në vendin ku u qëlluan 4 protestuesit.
Në ndryshim nga vitet e tjera, kësaj radhe u vu re mungesa e kreut të qeverisë, Edi Rama, i cili ndodhet në Ukrainë.
Në ceremoni ishin të pranishëm, zv.kryeministri Erion Braçe, kreu i Grupit të PS, Taulant Balla dhe deputetë të tjerë socialistë.
Katër viktimat e “21 janarit”, morën statusin e “Dëshmorit të Atdheut”.
Socialistët e quajtën krim shtetëror vrasjen e katër protestuesve dhe akuzuan drejtpërdrejt ish-kryeministrin Sali Berisha.
Ata premtuan se ngjarja do të zbardhet dhe përgjegjësit do të dalin përpara drejtësisë, kur të vijnë në pushtet.
Mirëpo tashmë edhe pas 9 vitesh, të vetmit që u dënuan ishin ish-komandati i Gardës, Andrea Prendi dhe gardisti Agim Llupo.
