Muzeu Kombëtar në Tiranë ka hapur dyert për të zhvilluar homazhet për aktorin e mirënjohur që ndërroi jetë dje, Mirush Kabashin.
Shumë miq, aktorë, figura të shquara të artit, politikanë dhe familjarë të tij ishin pjesë në këtë ceremoni, për të respektuar edhe një herë atë çfarë la pas Mirushi.
Sipas informacioneve, mësohet se homazhet të mbahen deri rreth orës 13:00 dhe më pas trupi do të prehet në varrezat e Sharrës.
Mirush Kabashi ose i njohur ndryshe si “Sokrati” u nda nga jeta në moshën 75-vjeçare, pasi luftoi për disa vite me një sëmundje të rëndë.
Ai ka lënë gjurmë të mëdha në aktrimin shqiptar, në tetarër dhe në kinematografi me mbi 100 role të vendosura në skenë. Mirushi ishte i njohur si një nga interpretuesit më të mirë të poezisë, i cili zgjodhi që përmes skenës të përciellë mesazhe për jetën. Aktori zgjodhi të kishte gjithmonë një jetë modeste, pa e përzier artin me lekët apo me përfitime të tjera.
