Holanda nuk e ka ndarë akoma mendjen përsa i përket përgjigjes finale, për hapjen apo jo të negociatave me Shqipërinë.
Në parim parlamenti holandez është pozicionuar kundër dhe ka kërkuar që Maqedonia e Veriut dhe Shqiëpria të trajtohen të ndara.
Mirëpo, sipas “Top Channel”, parlamenti holandez la të martën një shteg, për të votuar si Gjermania, për çeljen me kushte të negociatave.
Megjithatë vendimin final, Holanda do ta marrë, pasi të shohë votën e Francës më 15 tetor, në mbledhjen e këshillit të ministrave të BE-së.
Për momentin situata është, një Holandë e dyzuar, një francë hezituese dhe Gjermania që i ka thënë tashmë po Shqipërisë, por me 9 kushte.
Shumë prej vendeve të Bashkimit Europian, janë shprehur për një domosdoshmëri të nisjes së bisedimeve njëkohësisht me të dyja vendet, për të eleminuar rrezikun rus, turk dhe kinez në rajon.
Nëse takimi i minstrave më 15 tetor, nuk do të prodhojë dakordësi, gjithçka do të vendoset në samitin e liderëve, më 17 dhe 18 tetor, ku sipas ekspertëve, kancelarja gjermane, Angela Merkel, mund të ndikojë te presidenti francez, Macron, për t’i marrë një ‘po’.
Franca nga ana e saj kërkon që për Maqedoninë e Veriut dhe Shqipërinë të ndiqen formula të ndryshme.
Samiti i liderëve të unionit do të jetë vendimtar, ku nuk përjashtohet mundësia e gjetjes së një formule të re për integrimin e vendeve të Ballkanit.
