Pas tensioneve të forta të qytetarëve të Himarës në mbledhjen e Këshillit Bashkiak, është njoftuar se mbledhja do të nisë tani në orën 12:00, për të zgjedhur kryebashkiakun e ri politik të Himarës.
Bëhet me dije se dyert janë mbyllur për qytetarët, ndërsa vetëm mediat do të kenë mundësi ta ndjekin mbledhjen nga afër.
Vendimi është marrë nga drejtues të Këshillit Bashkiak që e kanë shpjeguar këtë me trazirën që u shkaktua.
Kujtojmë se qytetarët protestuan kundër pranisë në mbledhje të të dërguarve nga qeveria, të Blendi Klosit dhe të Vangjel Tavos në një mbledhje ku ishin anëtarët e Këshillit Bashkiak vendor që do të duhej të zgjidhnin një drejtues të ri.
Mazhoranca socialiste synon të vendosë në krye të kësaj bashkie, një nga dy nënkryetarët e saj socialistë, Pervin Gjikurinë ose Blerina Balajn dhe jo ndonjë përfaqësues të opozitës, pavarësisht se opozita i ka fituar zgjedhjet në këtë bashki më 14 maj.
Theksojmë se Jordo Goro dhe Fredi Beleri janë të arrestuar nga SPAK, si dy ish-kryebahskiakët e kësaj bashkie.
