Gjendja në Komunën e Deçanit është normalizuar që pas helmimit masiv nga uji. Lajmin e ka bërë të ditur kryetari i komunës, Bashkim Ramosaj. Po ashtu, në mbledhjen e ditës së sotme është marrë vendimi për të hequr gjendjen e emergjencës që ishte vendosur më parë.
Ramosaj ka thënë se situata ka filluar të normalizohet dhe ka falenderuar të gjithë ata që ndihmuan në tejkalimin e gjendje, ndërsa shpreson që ngjarja të mos përsëritet sërish.
“Të nderuar qytetarë të Komunës së Deçanit, pasi që gjendja në komunën tonë ka filluar të normalizohet sot në mbledhjen e Shtabit për Menaxhimin e Emergjencave; u mor vendim për ndërprerjen e Gjendjes Emergjente në Komunën e Deçanit. Falënderues dhe mirënjohës të gjithë atyre që kontribuuan që të tejkalohet kjo gjendje. Shpresoj dhe uroj që mos të përballemi me situata të tilla”, ka thënë Ramosaj.
Kujtojmë se më shumë se 1600 qytetarë u helmuan nga uji në komunën e Deçanit dhe kërkuan ndihmë mjekësore. Nga analizat e kryera nga Instituti Kombëtar i Shëndetit Publik të Kosovës, rezultoi se uji ishte i kontaminuar me bakterin E.coli që e bën atë të papijshëm. Ndërkohë, komuna e Deçanit i ndërpreu kontratën kompanisë “Hidrodrini”, që menaxhonte furnizimin me ujë të pijshëm.
