Edith Harxhi, kandidatja për kryetare të Partisë Demokratike, së bashku me grupin “Për PD-në”, kanë zhvilluar ditën e sotme takime me anëtarësinë e PD-së në Gjirokastër. Harxhi ka denoncuar publikisht se Lulzim Basha po mban peng listën e anëtarësisë.
Nga Gjirokastra ku shoqërohej edhe nga Bujar Nishani e Edvin Kulluri, Harxhi tha se ka një javë që serveri i listave të votuesve të PD-së për zgjedhjet e 13 qershorit është i bllokuar dhe asnjë nga degët nuk mund të zbresë dhe të marrë listën.
Harxhi u shpreh ndër të tjera se Partia Demokratike është marrë peng nga Basha dhe se kjo gjë duhet të marrë fund sa më shpejt në mënyrë që të mos përfundojnë si LDK-ja e Kosovës.
“Anëtarët e Grupit për PD-në më kërkuan që të kandidoja. Pse? Një nga arsyet është sepse do të ishte një ndryshim për herë të parë kandidon një grua, por unë nuk hyj në këtë garë vetëm sepse jam grua. Ne duhet ta shpëtojmë PD-në sepse është marrë peng dhe mund të përfundojmë si LDK-ja e Kosovës. Kishim bërë një propozim për të bërë një marrëveshje për dekomunistizmin në Shqipëri dhe nuk është pranuar. Ka një javë që serveri i listave të votuesve të PD-së për zgjedhjet e 13 qershorit është i bllokuar dhe asnjë nga degët nuk mund të zbresë dhe të marrë listën. Lista s’mund ti përkasë serverit qendror të parties, s’është pronë e Bashës. Unë i sfidoj ata që pas 4 humbjesh rresht vazhdojnë të mbajnë peng partinë,”- tha Harxhi.
