Fjala “tragjike” as që mund të fillojë të përshkruajë sulmin ajror izraelit që i vuri zjarrin një kampi tende në Rafah të Rripit të Gazës, duke vrarë 45 palestinezë, tha këtë të martë zëvendëspresidetja e SHBA Kamala Harris.
Komenti erdhi ndërsa Harris po i përgjigjej një pyetjeje nga një gazetar, pas bombardimeve izraelite të së dielës ndaj kampit dhe një zone evakuimi në West Rafah, ku 21 persona u vranë sot, sipas shërbimeve shëndetësore të enklavës palestineze.
Ngjarjet janë një provë tjetër e zotimit të Presidentit Joe Biden për të mos armatosur aleatin e SHBA-së nëse do të vazhdonte me një operacion në shkallë të gjerë që do të vinte në rrezik njerëzit e zhvendosur në Rafah.
Harris, e cila e bëri deklaratën në një ceremoni në Uashington, nuk iu përgjigj një pyetjeje pasuese nëse sulmet e Izraelit në Rafah përbëjnë një shkelje të “vijës së kuqe” të SHBA.
Departamenti i Shtetit shprehu sot “dhimbjen më të thellë” për palestinezët e vrarë të dielën në Rafah, duke vënë në dukje se rezultatet e hetimit të ushtrisë izraelite janë në pritje, me shpresën se hetimi do të kryhet “shpejt dhe transparent”. Zëdhënësi i Departamentit të Shtetit, Matthew Miller, theksoi se Uashingtoni do të vazhdojë t’i theksojë Izraelit se është i detyruar të respektojë plotësisht ligjin ndërkombëtar humanitar, të minimizojë pasojat e operacioneve të tij mbi civilët dhe të maksimizojë rrjedhën e ndihmave humanitare për ata që kanë nevojë.
