Debati në distancë mes kryeministrit Rama dhe kryeministrit Haradinaj vazhdon të mbetet ende i nxehtë.
Ky debat u hap pas deklaratës së Haradinaj se Rama i ka bërë presion për heqjen e taksës ndaj Serbisë gjatë Samitit të zhvilluar në Berlin, gjë që kryeministri shqiptar e ka mohuar.
Mirëpo Haradinaj nuk është ndalur me aq dhe ditën e sotme nga mbledhja e qeverisë ka thënë se i detyrohet shqiptarëve të vërtetën dhe këtë ka për ta thënë i peshon kujt i peshon.
“Shiqoni për mu shqiptarët edhe të majtë edhe të djathë janë vëllaznit e mi ua kam borgj të vërtetën “Rrnoj me tregu”, do të tregoj të vërtetën edhe kur i pëlqen edhe kur i pëlqen edhe kur si pëlqen dikujt do ta tregoj çdo herë, sepse jemi në obligim të një transparence këtë do ta bëj edhe të ardhmen. E shoh me atë që ka thënë At Zef Pllumi: Rrno me tregu, shyqyr që aty është dikush me tregu të vërtetën”, ka thënë Haradinaj gjatë fjalës së tij.
Ai tha se ishte shumë i kujdesshëm në intervistën që dha për Gazetën Express nga Berlini.
“Atë që kam thënë në intervistë që vërtetë është një intervistë e kujdesshme që kam rujt shumë, se po thotë dikush skem me hesht, vërtetë kam rujt shumë gjana, ajo qëndron, njëkohësisht është me rëndësi që të kemi një qëndrim publik, edhe ai me dyer të mbyllura është i mirëseardhur”.
