Hapet COVID-2/ Manastirliu: Në spitalin “Shefqet Ndroqi” u krye ndërhyrja e parë tek një 18-vjeçare e infektuar

Google+ Pinterest LinkedIn Tumblr +

Ministrja e Shëndetësisë Ogerta Manastirliu ka bërë me dije, siç ishte paralajmëruar, se që nga dita e sotme spitali “Shefqet Ndroqi” është spitali i dytë COVID në vend.

Në këtë spital është realizuar edhe një ndërhyrje kirurgjikale tek një paciente 18-vjeçare e infektuar me koronavirus.

Fillimisht vajza 18-vjeçare nga Lezha është paraqitur në spital me apandesit të gangrenizuar, por pas bërjes së testit rezultoi pozitive me koronavirus.

“Kemi hapur edhe spitalin COVID 2, spitalin “Shefqet Ndroqi” i cili ka pritur pacientin e parë. Një rast suksesi i ekipit të kirurgjisë së këtij spitali, me mjekët kirurgë, anestezistë, infermierët dhe i gjithë stafi që kanë kryer me sukses ndërhyrjen kirurgjikale tek një e re e prekur nga COVID-19”, bëri të ditur Manastirliu.

Manastirliu u shpreh se pacientët e spitalit “Shefqet Ndroqi” janë transferuar në Elbasan, duke shtuar se në spitalin COVID 2, janë organizuar ekipet mjekësore që do të shërbejnë në këtë spital.

Ministrja e Shëndetëisë tha se kjo situatë do të kalohet duke respektuar të gjithë Paktin e Madh për Shëndetin.

“Ne do të vazhdojmë t’ju shërbejmë me përkushtimin dhe sakrificën e mjekëve, infermierëve, epidemiologëve tanë të mrekullueshëm. Ne do të vazhdojmë t’ju mbajmë të informuar me korrektësi dhe transparencë maksimale çdo ditë, çdo orë, për çdo zhvillim. Ndërsa JU, ju do të vazhdoni të zbatoni rigorozisht masat e higjenës dhe të distancimit social, si i vetmi mjet për të ndihmuar njëri-tjetrin në këtë betejë të përbashkët”, tha Manastirliu.

Ndërkohë, në Shqipëri janë 212 persona të infektuar me COVID-19 dhe janë shënuar 10 viktima, teksa 40 nga të prekurit janë shëruar, por harta e infektimit është zgjeruar.

Mirdita i është bashkuar listës së fundmi, me 1 të infektuar, ndërsa epiqendra është në Tiranë me 121 të infektuar.

Shpërndaje
Share.

Komento