FIER– Pak ditë më parë një ngjarje e rëndë tronditi qytetin e Fierit.
2 kushërinjtë Manol Rrapaj dhe Elisa Kapaj u qëlluan me 13 plumba, duke mbetur të vdekur në vend.
Për këtë u arrestua Martin Skëndaj, gardiani i burgut të Fierit.
Së fundmi, “Shqiptarja.com” zbardh të plotë dinamikën e kësaj ngjarjeje.
Nga hetimet e para rezultoi se shkak i kësaj ngjarjeje është bërë motra e Martin Skëndaj.
Ajo ka qenë e martuar në Mallakastër , por ndërkohë ka pasur lidhje me viktimën Manol Rrapaj, banor i fshatit Kuqar të Patosit dhe komshi me Martin Skëndaj.
Motra e Martin Skëndaj, për shkak të kësaj lidhjeje, është divorcuar nga bashkëshorti i saj dhe ka shkuar për të jetuar në një qendër sociale, në Vlorë.
Më 17 dhjetor 2019, Aleksandër Skëndaj, babai i Martin Skëndaj, është provokuar nga Manol Rrapaj, cili teksa e ka parë në rrugë i ka rënë borisë së makinës në rrugën e lagjes.
Kaq ka mjaftuar që dy persona të konfliktohen dhe më pas Martin Skëndaj, ka dalë nga banesa dhe ka ndërhyrë në këtë konflikt.
Më 19 dhjetor 2019, rreth orës 09:00 të paradites, Martin Skëndaj ka shkuar në Poliklinikën e Patosit, për të marrë një raport mjekësor për dëmtimin e dorës së djathtë.
Prej mjekes së poliklinikës i është sugjeruar të shkonte në Poliklinikën e Fierit, ku të merrte një rekomandim nga mjeku specialist ortoped dhe në këto rrethana ka shkuar në Poliklinikën e Fierit dhe pasi ka marrë rekomandimin, rreth orës 12:00 ka shkuar në Poliklinikën e Patosit.
Në kohën që ka qenë në poliklinikë, ka parë që në dhomën e mjekes ishte, Manol Rrapaj, me të cilin Martin Skëndaj, dhe familja e tij ishin konfliktuar ditë më parë.
Manoli është larguar nga poliklinika, ndërsa Martini, ka hyrë përsëri te dhoma e mjekes, ku përsëri i është rekomanduar të shkonte në Poliklinikën e Fierit.
Në kohën që Martin Skëndaj, po dilte nga dera kryesore e poliklinikës është përballur me Manol Rrapaj, babanë e Manolit, Vladimir Rrapaj, dhe një kushëri të tyre që quhet Elis Kapaj.
Ky i fundit mbante, në dorë një send të fortë, levë, dhe ka filluar të debatojë me Martinin duke i thënë që “…hajde të sqarohemi pak bashkë…” dhe pasi i është afruar, e ka qëlluar me një levë në dorë.
Sapo ka dalë nga poliklinika është përballur me goditjet me levë që i ka bërë Elis Kapaj dhe Manol Rrapaj.
I gjendur përballë këtij sulmi , gardiani ka nxjerrë armën e shërbimit dhe ka qëlluar mbi të dy agresorët.
Në një moment që Manol Rrapaj dhe Elis Kapaj, kanë dalë në pjesën anësore të Poliklinikës së Patosit pranë një automjeti, aty ka shkuar menjëherë Martin Skëndaj, i cili ka filluar të qëllojë me armën personale në drejtim të tyre duke i ndjekur edhe me vrap.
Të parin ka vrarë Elis Kapaj, të cilin pasi e ka rrëzuar e ka qëlluar më pas me një plumb në kokë.
Elis Kapaj është larguar me vrap, por është ndjekur nga autori, Martin Skëndaj, i cili vazhdonte ta qëllonte me armë dhe në një moment, Elis Kapaj, pasi është qëlluar, ka rënë përtokë në sheshin para Poliklinikës së Patosit dhe aty i është afruar Martini, i cili fillimisht e ka qëlluar me shkelm në kokë dhe më pas, me armën që kishte në dorë.
Pas ekzekutimit të Eli Kapaj, autori është afruar përsëri me armën në dorë nga vendi, ku qëlloi fillimisht dhe ka qëlluar përsëri në drejtim të Manol Rrapaj. Pasi ka kryer dy vrasjet, autori ka qëndruar në vendngjarje, duke hedhur armën luftarake dhe i ka kërkuar një mjeku të poliklinikës, që të njoftonte policinë.
Skëndaj është arrestuar nga policia dhe ndaj tij momentalisht është ngritur akuza e “Vrasjes në rrethana të tjera cilësuese” kundër dy personave.
