Deputetja Rudina Hajdari ka dalë e irrituar nga mbledhja që pati me kryeministrin Edi Rama dhe me deputetët e tjerë të opozitës parlamentare.
Hajdari i bëri thirrje sërish Ramës për ndryshim të sistemit zgjedhor dhe u shpreh se duhet të hapen listat, duke shtuar se nuk ka shqiptar që do të shkojë në zgjedhje të votojë sigla partish, ndërkohë që vuri në dukje se e di që Rama ka një ‘marrëdhënie’ të ngushtë me kryedemokratin Lulzim Basha.
Ajo u zotua se do t’i shkojë deri në fund betejës për ndryshimin e sistemit zgjedhor.
“Ai u njoh shumë mirë me kërkesat tona, e kupton shumë mirë problematikën. Nuk ka pasur konsensus lidhur me ndryshimin e sistemit. Ne kërkojmë lista të hapur, nuk ka shqiptar që nuk e do ndryshimin e sistemit. Ne do të luftojmë për këtë betejë.Është e pamundur që shqiptarët të shkojnë e të votojnë sërish për siglat e partive. Rama e ka kuptuar këtë. Unë e kuptoj marrëdhënien e ngushtë të Ramës me Bashën, por Rama duhet të reflektojë dhe të shikojë kërkesat e opozitës parlamentare. Marrëveshja ishte tjetër gjë, riktheu PD dhe LSI, dhe kjo ishte shumë e mirë. Por ne duam të hapim listat. Ka ardhur koha për ta bërë këtë ndryshim. Nuk mundet absolutisht t’i mbyllet dera opozitës parlamentare, zotohem se do t’i shkoj deri në fund betejës”, u shpreh Hajdari.
Këto deklarata vijnë pas takimit që opozita parlamentare ka pasur me kryeministrit Edi Rama, fokusi i të cili ishte Reforma Zgjedhore, pasi opozita ka deklaruar se nuk do ta votojë marrëveshjen e 5 qershorit në Parlament pa u plotësuar 2 kushtet që kanë, depolitizomi i administratës Zgjedhore dhe ndryshimi i sistemit zgjedhor.
Pas takimit që zgjati më shumë se 100 minuta, deputeti Myslim Murrizi u shpreh se ata nuk do e votojnë marrëveshjen nëse nuk plotësohen kushtet e tyre.
Nga ana tjetër, Rama tha se në tryezë u hodhën akuza në bllok se po tentohen të blihen deputetë, por shtoi se kjo gjë nuk ndodh.
