Shqipëria dhe Maqedonia e Veriut nuk mundën dot që të merrnin dritën jeshile për hapjen e negociatave.
Ishte këmbëngulja e Francës goditja më e fortë që iu dha negociatave.
Në lidhje me qëndrimin e Macron kanë reaguar shumë figura me peshë në arenën politke evropiane.
Ndër to edhe Komisioneri për Zgjerimin dhe Fqinjësinë e Mirë, Johannes Hahn, i cili ka ndjekur nga afër ecurinë e reformave dhe ka rekomanduar hapjen e negociatave.
Hahn nuk e ka fshehur zhgënjimin, ndërsa ka vënë në dyshim seriozitetin e Europës me Ballkanin perëndimor.
Më tej shton, se ky vendim mund të sjellë destabilizimin e Ballkanit perëndimor, që mund të ketë ndikim në të gjithë Europën më pas.
“ Udhëheqësit e BE nuk arritën të dakordësohen për hapjen e negociatave të Shqipërisë dhe Maqedonisë së Veriut në Europë. Kjo është tregoi një zhgënjim ekstrem. Vendet e BE tani duhet të sqarojnë se sa serioz është angazhimi i tyre për integrimin e Ballkanit Perëndimor. Ky nuk është moment lavdie për Evropën. Refuzimi i zgjerimit do të ketë pasoja negative, përfshirë edhe rrezikun për destabilizimin e Ballkanit Perëndimor, që do të ketë ndikim të plotë në gjithë Evropën. Falënderoj të gjithë ata që natën e kaluar bënë gjithçka për të arritur një vendim me rëndësi të madhe dhe strategjik për Evropën, si dhe luftuan për të dërguar sinjale shprese te qytetarët e Ballkanit Perëndimor”, u shpreh Hahn.
Gjatë samitit të sotëm, çështja e negociatave nuk u diskutua, pasi vula ishte vënë që një natë më parë me këmbënguljen e Francës për reformim të BE-së.
