Kryeministri Edi Rama ka deklaruar se votat e pavlefshme në këto zgjedhje ishin të Partisë Socialiste. Ai ka thënë në emisionin “Opinion” se PS ka humbur tre mandate për shkak të këtyre votave dhe kjo është e habitshme. Kryeministri shtoi se i ka kërkuar komisionerëve dhe vëzhguesve të PS-së që t’i mbanin shënim të gjitha votat që kanë dalë të pavlefshme. Madje sipas Ramës, mes këtyre votave, mijëra ishin për Taulant Ballën.
“Ne kemi humbur tre mandate nga votat e pavlefshme. Është e habitshme në fakt. Ne u kemi kërkuar të gjithë tanëve që të mbajën shënim të gjitha votat që kanë dalë të pavlefshme. Kjo për t’i pasur të shënuara. Dhe është e habitshme, mijëra e mijëra vota kanë shënuar numrin 12. Madje mijëra mes tyre kishin votuar Ballën”, tha Rama.
Në këto zgjedhje rezultoi një numër i madh votash të pavlefshme, konkretisht rreth 83 mijë të tilla. Kandidatët e pavarur të Vetëvendosjes ngritën pretendimet se një pjesë e votave të tyre ishin shpallur qëllimisht të pavlefshme, ndërsa për këtë kishin edhe foto e video.
Ndërkohë, pjesa dërrmuese e votave të vlefshme shkuan për Partinë Socialiste që u shpall edhe fituese e zgjedhjeve duke siguruar 74 mandate. PD nga ana tjetër siguroi 59 mandate, LSI 4, ndërsa 3 mandate arriti të marrë edhe Partia Social Demokrate.
