Euronews Albania ka siguruar dosjen e plotë të skandalit të mikrokredive, e cila është çuar nga Prokuroria e Tiranës për hetime të mëtejshme në SPAK.
Dosja përshkruan mënyrën se si një grup i strukturuar kriminal ka mashtruar qytetarët me pasoja të rënda ekonomike dhe psikologjike.
Një nga rastet më dramatike është ai i Fiqirit dhe Zahides Bruci, të cilët pas marrjes së një overdrafti për shkollimin e fëmijëve, janë përfshirë në një skemë mashtrimi.
Ata nuk u njoftuan nga banka se detyrimi i tyre për kamatën prej 7 mijë lekësh, që e kishin shlyer, iu shit 20-fishuar tek ‘MCA Albania’. Pas bllokimit të llogarive të pagave dhe nënshtrimit ndaj kushteve të paligjshme, ata ishin detyruar të merrnin një kredi konsumatore, e cila më vonë iu shit një institucioni tjetër financiar që bashkëpunonte në këtë skemë.
Fiqiri Bruci shprehet në prokurori se përveç dëmit ekonomik, ai dhe familja e tij po përjetojnë një dëm të madh psikologjik dhe moral.
Po ashtu, në dosje renditet edhe rasti tragjik i Pal Trashaj, i cili i dha fund jetës pasi ishte përfshirë në këtë skemë. Pavarësisht ankesave të shumta dhe pagesës së një detyrimi të madh, Trashaj nuk arriti të zhbllokonte pronat e tij, pasi ishte detyruar të paguante 360,500 lekë për një detyrim tjetër të vitit 2008, mbi të cilin ishte vendosur sekuestro. Kjo çoi në procedura ankandesh fiktive dhe shitjes së pasurive të tij.
Prokuroria e Tiranës ka dokumentuar gjithashtu ristrukturimet e kredive dhe ankandet fiktive, ku janë zhvilluar më shumë se 2000 ankande të tilla gjatë vitit 2023, që janë përdorur nga shoqëritë MCA dhe Final për të manipuluar pasuritë e qytetarëve. Skema ka marrë përmasa të gjera dhe ka shkaktuar pasoja të rënda për të prekurit.
Dosja është çuar në SPAK për hetime të mëtejshme.
