Një grup i parë prej 250 shtetasish afganë, priten të mbërrijë në Shqipëri brenda kësaj jave. Burime diplomatike treguan për Zërin e Amerikës se bëhet fjalë për përkthyesë dhe bashkëpunëtorë të niveleve të ndryshme të strukturave amerikane në Afganistan. Ata do të transferohen në vendin tonë, së bashku me familjet e tyre.
Një prej anëtarëve të kabinetit Rama, është caktuar të merret me organizimin e të gjithë procesit të pritjes dhe akomodimit të afganëve, të cilët parashikohet të ndahen në disa grupe duke u strehuar në struktura të veçanta.
Shqipëria dje konfirmoi zyrtarisht se i ishte përgjigjur pozitivisht kërkesës së qeverisë amerikane. Kryeministri Edi Rama shpjegoi se do të priten disa qindra persona, nga rrethet intelektuale dhe të grave aktiviste afgane, të cilët, siç theksoi ai, janë nga të parët në listat e ekzekutimeve të barbarëve të Afganistanit, shkruan VOA.
Sot, ministrja e Jashtme, Olta Xhaçka ndërsa ripostonte një “Twitter” të Sekretarit amerikan të Shtetit, Antony Blinken, lidhur me qytetarët afganë që duan të largohen nga vendi i tyre, theksoi dhe një herë se Shqipëria është gati të presë disa qindra afganë, duke shtuar se ne jemi krah për krah me aleatët tanë, të gatshëm për të garantuar sigurinë dhe mirëqënien e tyre.
