Tubimet e partive politike në kuadër të fushatës elektorale muajin e fundit sollën shqetësime për përhapjen e mëtejshme të koronavirusit në vendin tonë. Masat kufizuese u shkelën jo vetëm në ditët e fushatës, po edhe ditën e zgjedhjeve ku pati grumbullime masive.
Në lidhje me këtë situatë ka folur edhe zëvendësministrja e Shëndetësisë, Mira Rakacolli, Në A2 CNN, ajo ka thënë se pritet një shtim i rasteve të infektimeve në dy javët e ardhshme. Kjo pasi do të reflektohet moszbatimi i masave siç duhet.
“Jemi në ankth sesi situata do të shkojë në dy javët e ardhshëm pasi pritet të reflektojnë moszbatimin e masave siç duhet gjatë tubimeve në disa subjekteve politike”, ka thënë Rakacolli.
Zëvendësministrja foli gjithashtu për situatën në spitalet Covid. Ajo bëri me dije se nuk ka shumë pacientë të shtruar, por shumë prej rasteve janë në gjendje të rëndë. Ndërkohë, vdekjet nuk janë në shifrat që kanë qenë më parë.
“Nuk kemi shumë pacientë në spital, por ka shumë raste që ndodhen në gjendje të rëndë. Vdekjet nuk janë në shifrat që kanë qenë më parë, por po ta krahasosh me numrin në spital, diferenca nuk është aq e madhe”, tha Rakacolli.
Kujtojmë që gjatë fushatës elektorale partitë nuk i respektuan rregullat e distancimit social duke bërë tubime me shumë qytetarë siç ka qenë konkretisht Partia Demokratike. Nga ana tjetër edhe Partia Socialiste mbajti një miting me shumë njerëz për fitoren e zgjedhjeve, duke mos respektuar masat kufizuese.
