Deputetja e zgjedhur e Partisë Demokratike, Grida Duma ka komentuar shkarkimin e presidentit Ilir Meta duke thënë se parlamenti i dha një tjetër goditje demokracisë. Në një intervistë në News 24, Duma tha se parlamenti është duke legjitimuar moslegjitimitetin e vet. Ajo u shpreh se opozita parlamentare nuk ekziston. Duma e quajti të paarsyeshme mbrojtjen e Kushtetutës nga një parlament jokushtetues dhe tha se shpreson që Gjykata Kushtetuese të jetë hallka e fundit e ruajtjes së balancave.
“Problemi i madh i Shqipërisë është ekzistenca e institucioneve që zotërojnë njëra-tjetrën. Cilido institucion, si Presidenti, që ruan balancën do të kishte vlerë të jashtëzakonshme.
Parlamenti thjeshtësisht theksoi anën negative, duke i dhënë një goditje tjetër ndaj demokracisë. As e udhës, as e momentit kur dimë që zgjedhjet kanë ndodhur, dhe mundësia e parlamentit për të pasur një legjitimitet me opozitën reale, janë, kurse ky parlament po legjitimon moslegjitimitetin e vet. Opozita parlamentare nuk ekziston. Sado konflikt interesi të kem unë që jam palë, jam pjesë e PD, ajo nuk ekziston.
Mund të ketë të tillë që duan të bëjnë një pjesë opozitarizmi, por opozita është kjo. Opozita duhet të jetë aty në faktin, formën e përmbajtjen në kushtëzimin e palës tjetër. Kur nuk e kushtëzon, gjithçka e bën një opozitë inekzistente.
Kështuqë është e paarsyeshme që një parlament jokushtetues të mbrojë Kushtetutën. Shpresoj që Gjykata Kushtetuese, si Reforma në Drejtësi që është kali më i madh i betejës, shpresoj që Gjykata të shërbejë si hallka e fundit e ruajtjes së balancave.
Pavarësisht si gjykohen të gjitha vendimet, duhet një institucion që ti vendosë kufi pushtetit të Rilindjes që është i pakufishëm”, u shpreh Duma.
