Godina e ALBCONTROL do të merret tashmë në ruajtje nga Forcat e Armatosura. Lajmin e ka dhënë vetë ministrja Belinda Balluku e cila deklaroi se Policia e Shtetit do të bëjë detyrën për të liruar ndërtesën nga kontrollorët që kanë vendosur të mos jenë më kontrollorë, duke iu referuar personave që janë nën grevë.
“Nuk kishte disponim financiar, pra nuk punoni; nuk ka para. Dëgjova avokatin tuaj që thoshte; që të marrin kredi dhe ta paguajnë. Ju sot pagat i merrni për shkak të një kredie. Ka marr një kredi Albcontrol nga Eurocontrol dhe sot ka nisur pagesa e parë e këstit. Nëse na sugjeroni që të marrim një tjetër kredi; jo nuk e marrim dot! Ju lutem shumë të gjithë kontrollorëve të trafikut ajror, që të kthehen në detyrë, sipas organizimit të turneve që keni pasur apo t’ju orientojnë drejtuesit tuaj. Për shkak të papërgjegjshmërisë tuaj, na lind e drejta që mos të kemi më besim tek ju ndaj mund të kryeni dhe aksione shumë më të rrezikshme për hapësirën shqiptare dhe për popullin shqiptar. Ndaj nga ky moment ndërtesa do të merret në ruajtje nga Forcat e Armatosura të Republikës së Shqipërisë. Nga ky moment Policia e Shtetit do të bëjë detyrën për të liruar ndërtesën nga ata kontrollorë që kanë vendosur që të mos jenë më kontrollorë. Të gjithë të tjerët, vajza e djem që janë rritur në Albcontrol shpresoj që t’i kthehen detyrës dhe të harrohet sa më shpejt kjo histori.”, tha Balluku.
Këtë e ka konfirmuar edhe Ministri i Mbrojtjes Niko Peleshi i cili ka publikuar videon nga zbarkimi i FA në Rinas.
“Aeroporti i Rinasit Nënë Tereza është objekt strategjik me rëndësi të veçantë për sigurinë kombëtare. Strukturat tona të Forcave të Armatosura, si pjesë integrale e aeroportit, kanë rritur vigjilencën për të garantuar ruajtjen e perimetrit të sigurisë së aeroportit veçanërisht pas bojkotimit të punës nga kontrollorët e kompanise së aviacionit civil Albcontrol sha”, shkruan Peleshi.
https://www.facebook.com/watch/?ref=saved&v=445257643234686
