Deri në këto momente Coronavirusi ka trokitur në 122 shtet dhe ka shkaktuar 4,614 viktima teksa ka infektuar 126,007 persona.
Situata më e vështirë paraqitet në Itali, e cila është e gjitha në karantinë, teksa pritet që javës tjetër të jenë prekur të gjitha shtete europiane.
Në mes e kësaj situate të vështirë që po kalon bota, duket se ka edhe disa lajme të mira që mbajnë gjallë shpresat e njerëzve.
I tillë është lajmi i fundit që vjen nga Greqia, pasi Qendra Operative e Krizave Spitalore, ka njoftuar se ‘pacientja 0’ e diagnostikuar disa ditë më parë me COVID-19 është plotësisht e shëruar.
Tashmë pritet që 38-vjeçarja të plotësojë afatin 14-ditor të qëndrimit në karantinë dhe të largohet nga spitali për t’iu kthyer jetës normale.
Ajo u evidentua si e prekur nga Coronavirusi, pasi u paraqit në spitalin Ahepa të Selanikut, mbas një udhëtimi biznesi në Milano.
Prej ekzaminimeve, u konstatua se edhe djali i saj 9 vjeç ishte prekur nga COVID-19 dhe të dy u izoluan në spitalin e Selanikut në kushtet e karantinës së plotë.
Simptomat e tyre nuk ishin të rënda dhe organizmi i tyre reagoi mjaft mirë ndaj medikamenteve me të cilat u trajtuan.
Në Greqi deri tani janë 99 persona të infektuar, 3 prej të cilëve ndodhen në gjendje të rëndë në spital.
Në vendin tonë ka shkuar në 15 numri i të prekurve dhe deri tani është shënuar vetëm 1 viktimë.
Qeveria ka marrë masa të shumta, që nga mbyllja e shkollave e ambienteve publike, tek nxjerrja e policisë ushtarake nëpër rrugë për evidentimin e personave të prekur që nuk vetëkarantinohen.
Ndërkohë, duke nisur nga dita e nesërme trnsporti publik urban në Durrës dhe Tiranë nuk do funksionojë, pasi bashkitë përkatëse vendosën ndërprerjen e tij.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
